O zoo de 'Tiger King' pecha permanentemente ao perder a súa licenza

Jeff Lowe, o actual propietario do zoo, acusa a organizacións protectoras dos dereitos dos animais do peche das instalacións, a pesar de que as autoridades confirman varias infraccións nas mesmas
Joe Exotic na imaxe promocional de 'Tiger King'. NETFLIX
photo_camera Joe Exotic na imaxe promocional de 'Tiger King'. NETFLIX

O zoolóxico de Tiger King, a serie documental de Netflix que espertou un fenómeno televisivo durante o confinamento polo coronavirus, pecha as súas portas de xeito permanente tras perder a licenza de operacións emitida polas autoridades estadounidenses.

O centro, coñecido como G.W. Exotic Animal Park e situado no estado Oklahoma, fíxose famoso mundialmente cando Netflix estreou en marzo pasado a serie documental Tiger King e actualmente é propiedade de Jeff Lowe despois de que o seu anterior dono, o popular Joe Exotic, ingresase en prisión.

Nun comunicado, o actual propietario asegura que o fenómeno espertado pola produción de Netflix "trouxo máis atención que a que ningún humano merece, boa e mala". Tamén acusa a organizacións protectoras dos dereitos dos animais e o medioambiente, como PETA, de presionar ao Departamento de Agricultura de EE.UU. para pechar as instalacións.

Pero a versión das autoridades difire, xa que no seu último informe de inspección cita varias infraccións como que a comida dos felinos non estaba correctamente refrigerada e os donos trataron de enganar con facturas de reparacións falsas.

O propio Exotic, anterior dono do zoo e protagonista da serie documental, está actualmente no cárcere por contratar a un asasino por encargo e cometer varios delitos contra a flora e a vida dos animais. 

O peche do parque é "inmediato" e os seus novos donos trasladarán o equipo e os animais a un novo lugar desde o que gravarán "contido para televisión por cable e servizos de streaming".

Comentarios