O modelo brasileiro Tales Cotta, de 26 anos, faleceu este sábado tras sentirse indisposto cando participaba nun dos desfiles da Semana da Moda de São Paulo, o maior certame do sector en Brasil. Cotta, modelo da axencia Base MGE, sentiuse mal, sufriu un desmaio e quedou tendido na pasarela cando desfilaba.
O mozo recibiu asistencia médica alí mesmo e foi conducido con vida a un hospital, pero finalmente morreu cando era atendido. O evento continuou e realizáronse os dous desfiles que quedaban. Non sen algunha crítica. "Acaba de morrer unha persoa e estades aquí coma se a vida non valese nada", gritou un artista desde a pasarela no desfile de clausura.
A organización da Semana da Moda de São Paulo informou nun comunicado de que o mozo "sufriu un mal súbito no desfile" e de que, "a pesar de que foi atendido rapidamente polos socorristas do evento e conducido ao hospital, infelizmente non resistiu".
"Lamentamos esta fatalidade e ofrecemos as nosas sinceras condolencias á familia de Tales, así como á axencia Base MGT. Estamos a ofrecer toda a asistencia necesaria neste triste momento", agregaron os organizadores na súa nota. A marca Ocksa tamén divulgou un comunicado no que lamentou o ocorrido e ofreceu as súas condolencias.
A morte produciuse na última xornada da edición deste ano da Semana da Moda de São Paulo, na que Cotta xa desfilara o venres para a marca Ratier.
"NON DEBERÍAMOS ESTAR AQUÍ". Foi un cantante quen se dirixiu ao público na clausura do evento -na noite do sábado- para criticar a decisión da organización de continuar coa programación tras a morte do modelo. Varios artistas saíron á pasarela para animar o evento coas súas cancións, menos un deles, que, desde alí, decidiu facer unha alegación contra o que estaba a suceder.
"Non deberías estar aquí, non deberiamos estar aquí", gritou sinalando a todo o público, e abandonou despois a pasarela.
