As autoridades estadounidenses atoparon artefactos explosivos en senllos sobres de correo dirixidos á exsecretaria de Estado de Hillary Clinton na súa oficina en Nova York e á residencia do expresidente Barack Obama en Washington.
"Os paquetes identificáronse de inmediato durante un control de correo como artefactos potencialmente explosivos e foron tratados en consecuencia", dixo este mércores o Servizo Secreto de Estados Unidos nun comunicado. Así mesmo precisou que nin Clinton nin Obama "chegaron a recibir os paquetes nin tampouco estiveron en perigo".
De acordo con The New York Times, que cita ás forzas da orde, os dispositivos son similares ao que achou e detonou a policía o luns na residencia do multimillonario filántropo George Soros, ao norte do Estado de Nova York.
O Departamento de Seguridade Nacional, do que depende o Servizo Secreto, sinalou na súa nota que os paquetes foron "identificados inmediatamente como artefactos explosivos durante procesos rutineiros de revisado do correo, e xestionáronse apropiadamente". "Os protexidos non recibiron os paquetes nin correron o risco de recibilos", agregaron os Servizos Secretos.
O asunto está baixo unha "ampla investigación criminal" e reunirá "todos os recursos dispoñibles" a nivel federal, estatal e local para "determinar a fonte dos paquetes e identificar aos responsables", agregan as autoridades.
Pola súa banda, a FBI de Nova York indicou nunha mensaxe na súa conta oficial de Twitter que está ao tanto do obxecto atopado preto da residencia dos Clinton, na localidade de Chappaqua (Nova York), e de que as súas forzas especializadas en terrorismo están a colaborar con outras axencias na investigación.
