As autoridades de Indonesia confirmaron este luns que un avión da compañía local de baixo custo Lion Air estrelouse aos poucos minutos de engalar no mar de Xava con 188 ocupantes a bordo, 181 pasaxeiros e sete tripulantes.
A aeronave, un Boeing 737 con identificativo JT 610 e unhas 800 horas de voo, desapareceu dos radares 13 minutos logo de engalar do aeroporto de Iacarta ás 6.20 hora local (23.20 GMT do domingo) con destino a Pangkal Pinang.
Antes de estrelarse, o piloto solicitara o regreso ao aeródromo da capital indonesia, indicaron as autoridades.
Nos momentos da desaparición, o aparello sobrevoaba o mar de Xava, apuntou o director da axencia nacional de urxencia, Muhammad Syaugi, durante unha rolda de prensa en Iacarta.
Na aeronave viaxaban 181 pasaxeiros -entre eles un neno e dous bebés- e sete tripulantes -dous pilotos e cinco auxiliares de voo-, segundo as cifras oficiais. Aínda que outras autoridades aumentan a seis os asistentes de voo e 189 as vítimas.
Un avión similar de Lion Air, a maior aerolínea de baixo custo en Indonesia, xa sufriu un incidente en 2013 ao estrelarse durante a aproximación final ao aeroporto internacional Ngurah Rai, na illa de Bali. Todas as persoas -101 pasaxeiros e 7 tripulantes- sobreviviron ao accidente.
