Noruega reimpón dez días de corentena aos viaxeiros procedentes de España

A medida entrará en vigor a madrugada do 25 de xullo
Viaxeiros nun aeroporto. EFE/Enric Fontcuberta
photo_camera Viaxeiros no aeroporto do Prat. EFE/Enric Fontcuberta

O Goberno noruegués anunciou este venres que reimpoñerá, a partir desta próxima medianoite, dez días de corentena para todos os viaxeiros procedentes de España tras constatar un repunte de casos nos últimos días. 

Así, "as persoas que regresen a Noruega desde España e Andorra deberán pasar por corentena durante 10 días ao seu regreso" nunha medida que se aplicará a calquera persoa que chegue a Noruega desde estes países logo da medianoite do venres 24 de xullo", segundo as recomendacións de viaxe do Ministerio de Asuntos Exteriores noruegués na súa páxina web. 

Así mesmo, "o Ministerio agora desaconsella as viaxes non esenciais a España e Andorra", dada a situación actual en ambos os países. Ambas as medidas permanecerán en vigor, en principio, ata o 20 de agosto. 

A política actual de Noruega permite a entrada no país daqueles países da Unión Europea ou a Zona Schengen con menos de 20 casos confirmados por cada 100.000 habitantes. Por contra, os últimos datos do Centro Europeo para a Previsión e o Control de Enfermidades (ECDC) revelan que a proporción de contaxios en España subiu a 30,9 por cada 100.000 habitantes. 

Comentarios