A ONG francesa SOS Méditerranèe informou este martes de que o plan proposto é trasladar aos 629 inmigrantes a bordo do Aquarius a dous buques da Mariña italiana para viaxar xuntos ao porto de Valencia tras o ofrecemento do Goberno de España e o rexeitamento de Italia e Malta a recibilos. SOS Méditerranèe, cuxo barco se atopa desde o pasado sábado entre Malta e Italia, explicou en Twitter que o Centro de Coordinación de Salvamento Marítimo (MRCC, nas súas siglas en inglés) de Roma comunicou que os náufragos a bordo do Aquarius serán trasladados a naves italianas e despois conducidos ao porto español de Valencia.
Este plan, segundo sinalou MSF na súa conta de Twitter, "significaría que as persoas rescatadas xa esgotadas terían que aguantar outros 4 días máis de viaxe no mar". Por iso, reiteraron que "a mellor opción sería desembarcar ás persoas rescatadas no porto máis próximo, e despois poderían ser transferidas a España ou a outros países seguros para recibir coidados e atención legal".
Por outra banda, MSF detallou nunha nota que o plan é "transferir 500 persoas do Aquarius a dous barcos italianos, mentres que os 129 restantes quedarían no barco da ONG para navegar xuntos a Valencia e despois desembarcar a todos os rescatados alí".
Mentres tanto, unha embarcación italiana detívose a distancia do Aquarius e enviou lanchas para fornecer algúns víveres, explicaron desde o barco da ONG francesa, que leva tamén persoal de Médicos sen Fronteiras.
O Aquarius foi rexeitado polas autoridades de Malta e Italia e finalmente o Goberno de España facilitou o porto de Valencia para que puidesen desembarcar os 629 inmigrantes rescatados o pasado sábado.
A ONG francesa explicou xa este luns que aínda que o ofrecemento de España é "un sinal moi positivo", Valencia atópase a "máis de 1.300 quilómetros e trataríase dunha dura viaxe de 4 ou 5 días". "Esta viaxe para persoas que xa se atopan en situacións extremas, incluíndo nenos e enfermos e que xa levan 72 horas en alta mar é un total fracaso para os países europeos que deben ter como absoluta prioridade o rescate destas persoas por encima de calquera disputa política", engadiron. Ademais, explicaron, "as condicións meteorolóxicas están a empeorar e a situación pode converterse en crítica".
Nun comunicado, MSF actualizou as condicións dos inmigrantes e afirmou que "o desembarco non se pode atrasar máis". MSF está particularmente preocupada por varios pacientes críticos que estiveron a piques de afogarse e que sufriron hipotermia e foron reanimados. "Estes pacientes están a ser estreitamente vixiados a bordo, xa que poden desenvolver rapidamente problemas pulmonares significativos logo de aspirar auga de mar", engadiron.
Ademais, "hai 21 pacientes que sufriron queimaduras químicas graves despois de estar expostos a unha mestura tóxica de auga de mar e combustible durante un período prolongado e necesitan cambios na vendaxe nos próximos días".
Tamén instaron a que "unha vez que as persoas rescatadas no mar sexan desembarcadas nun porto seguro, a próxima prioridade é que os gobernos e institucións da Unión Europea (UE) atopen solucións compartidas para apoiar aos países de primeira liña, como Italia".
"Negar o desembarco a persoas desesperadas rescatadas no mar non pode considerarse como unha vitoria: é a resposta equivocada á falta de responsabilidade e a repartición da carga entre os Estados membros" da UE, dixo Aloys Vimard, coordinador do proxecto de MSF a bordo do Aquarius despois das palabras do ministro italiano do Interior, Matteo Salvini.
A pesar de que Italia negou o desembarco, si permitiu que a súa Garda Costeira leve ao porto siciliano de Catania (sur) a 937 inmigrantes rescatados o domingo.
