Sánchez defende a venda de armas a Arabia "por Navantia" mentres Alemaña a frea

A Unión Europea mantense á espera da investigación do caso Khashoggi para dar unha resposta común

El presidente del Gobierno, Pedro Sánchez. EMILIO NARANJO (EFE)
photo_camera El presidente del Gobierno, Pedro Sánchez. EMILIO NARANJO (EFE)

O presidente do Goberno, Pedro Sánchez, defendeu este mércores manter as exportacións de armamento a Arabia Saudita "por responsabilidade", sen prexudicar á industria de defensa española e asegurando os empregos de Navantia na Bahía de Cádiz. 

"Teño que estar hoxe e aquí na defensa dos intereses de España, dos seus intereses estratéxicos, que ademais están situados en zonas moi afectadas polo drama do desemprego", dixo na súa comparecencia no Pleno do Congreso para dar conta das relacións comerciais de España con Arabia Saudita en materia de armamento. 

Mentres, a Unión Europea mantense á espera do resultado da investigación da morte do xornalista Jamal Khashoggi e non dará unha resposta común ata que se coñezan máis detalles das circunstancias da súa morte no consulado saudita en Istambul.

Sobre as vendas de armas ao réxime saudita, cuestionadas despois de que Alemaña anunciase que non aprobará novos contratos de exportación, a portavoz comunitaria recordou que a decisión final depende dos Estados membros, aínda que a súa decisión contradiga a posición común dos Vinte e Oito nesta materia.

Segundo o informe máis recente sobre esta cuestión, publicado en febreiro e correspondente ao ano 2016, quince países da UE (Austria, Bélxica, Bulgaria, República Checa, Dinamarca, Finlandia, Francia, Alemaña, Italia, Holanda, Polonia, Romanía, España, Suecia e o Reino Unido) venderon armas a Arabia Saudita durante ese exercicio.

A decisión de Alemaña, de onde procede apenas o 1% das armas que chegan a Arabia Saudita, non espertou reaccións similares nos tres maiores exportadores de armamento ao país na Unión Europea, que son o Reino Unido (23%), Francia (3,6%) e España (2,4%), segundo estimacións do Instituto Internacional de Estudos para a Paz de Estocolmo (Sipri).

Comentarios