Augas de Mondariz comezou a renovar a súa imaxe co lanzamento ao mercado dunha nova gama de botellas de vidro que recupera os trazos modernistas do século XIX -época de maior esplendor de Mondariz- e ofrece múltiples vantaxes diferenciais, tanto no ámbito da loxística como no da distribución. Este proceso de renovación dos envases de vidro é froito do traballo de I+D+i realizado pola compañía durante os últimos dous anos e leva un investimento próximo aos 5 millóns de euros. Augas de Mondariz iniciou a pasada semana a distribución dos novos envases aos seus clientes, dentro dun proxecto que suporá a saída ao mercado de 10 millóns de botellas. Trátase de envases máis eficientes, xa que o formato de 750 ml, ao presentarse en caixas de 18 unidades especialmente creadas e patentadas por Augas de Mondariz, permite optimizar o espazo ocupado para o seu almacenamento ata nun 75%. Ademais, este envase tamén incrementa a súa eficiencia en parámetros de consumo enerxético, xa que o mellor aproveitamento das neveiras reduce o gasto de enerxía. Así mesmo, a posibilidade de transportar máis litros en cada repartición permite recortar nun 39% os custos de repartición e subdistribución e reducir as emisións de CO2.
Estas novas botellas, que representan ao mesmo tempo a historia e a vangarda dunha marca como Augas de Mondariz, son redondas e máis estilizadas e elegantes. O seu deseño evoca a etapa de maior esplendor de Mondariz e integra elementos modernistas como as grecas e os relevos cunha lenda sobre o collarín da botella que recorda a orixe desta empresa centenaria: ''Mondariz desde 1873''. Ademais, unifícase o tapón da raia de todos os envases, pensando na comodidade para o consumidor e nunha imaxe máis moderna acorde coa evolución do mercado. Adaptación de formatos Co obxectivo de adaptarse aos estándares do mercado internacional, Augas de Mondariz, que ten distribución en 30 países, aposta por dous novos formatos de vidro: a botella de 750 ml para o consumo en mesa e a de de 330 ml para o consumo individual. Ademais, opta polo vidro transparente para as botellas de auga sen gas e a cor verde esmeralda para as de auga con gas, un cambio que recupera a antiga diferenciación de botellas por produtos e alíñase cos códigos cromáticos internacionais da auga carbonatada.
O novo deseño das botellas e as caixas creadas pola compañía é máis eficiente e permite optimizar ata nun 75% o espazo necesario para o seu almacenamento.
A nova imaxe recupera trazos modernistas da época de maior esplendor de Mondariz e integra a historia coa vangarda da marca.
Estes cambios permiten a Augas de Mondariz situarse á cabeza das empresas de auga mineral que lideran a utilización do innovador formato de 750 ml, xa habitual noutros produtos como o viño e que continúa gañando aceptación entre os consumidores de auga mineral. Unha imaxe diferenciadora O director xeral de Augas de Mondariz, Javier R. Losada, destaca que estes novos envases de vidro ''representan a esencia dunha marca como Mondariz, que ao longo dos seus 136 anos de vida soubo innovar e modernizarse sen deixar de lado os valores positivos que achega a súa historia centenaria''. Ademais, resalta que con esta renovación buscouse unha maior eficiencia loxística e ambiental e preténdese ''ofrecer aos consumidores unha imaxe diferenciadora e vangardista, que estea á altura da incuestionable calidade da auga de Mondariz''.
