O consumidor actual demanda calidade alimentaria, pero tamén comida de preparación rápida que lle axude a soportar a falta de tempo e o acelerado ritmo de vida ao que adoita estar sometido. "É posible conxugar ambos factores, a miudo percibidos como incompatibles polo consumidor, e así ou demostran as investigacións do Centro Tecnolóxico da Carne e da Calidade Alimentaria de Galicia", afirma Gonzalo Torres, responsable da Dirección Xeral de Investigación de Medio Rural, na que se integra dito centro.
Os pratos nos que traballa o Centro Tecnolóxico da Carne son variados e van desde a 'androia' de porco celta, cremas ou salteados de champiñóns ata o cordeiro asado ou guisado. Segundo explicou a Consellería do Medio Rural, os traballos de innovación combinan a calidade dos produtos galegos, o bo facer do cociñeiro Flavio Morganti --encargado de elaborar as receitas-- e as garantías dun proceso térmico de conservación que prolonga a vida útil do produto sen aditivos nin sustancias químicas.
O proceso iníciase coa elaboración da receita da man de Morganti, prosegue coa análise sensorial do produto e detense con especial coidado na realización de diversos ensaios de tratamento no pasteurizador. Segundo Medio Rural, o obxectivo é a mellor combinación de tempo, temperatura e presión no proceso de pasteurización para conseguir un produto cunha boa calidade sensorial e cunha vida útil que lle permita permanecer nas lineais do mercado o maior tempo posible garantindo unhas condicións excelentes de consumo.
Recursos
A colaboración do Centro Tecnolóxico da Carne e da Calidade Alimentaria coas empresas non se reduce só á dotación de equipamento, investigadores e medios senón que busca tamén a captación de recursos nas convocatorias públicas de investigación para financiar proxectos propostos polas compañías que, nalgúns casos, foron sufragados polas distintas administracións.
En concreto, o Centro traballa con medio centenar de industrias do sector, desde microempresas e pemes ata corporacións de tamaño maior. Entre outros servizos, pon á súa disposición a realización de analíticas e controis diversos de trazabilidad e de seguridade alimentaria, así como asesoramento e traballo en transferencia tecnolóxica.
Na súa planta piloto, que conta con sala de despezamento, zona de elaborados cárnicos e sala de pratos preparados, as empresas contan cun espazo onde, co apoio do persoal do Centro, poden ensaiar novos produtos e así innovar, sen necesidade de paralizar o seu proceso de produción.
'Fast food' enxebre e de calidade
