O recinto feiral de Expourense converterase durante os días 7 e 8 de xuño nun centro de negocios para que 48 adegas das seis denominacións de orixe (DO) de viños e licores de Galicia, mostren os seus viños e augardentes a máis de 90 compradores de España e 22 países máis.
A feira "Vinis Terrae" foi presentada pola directora de Relacións Internacionais de Expourense Emma González, que explicou que durante dous días, os importadores coñecerán no recinto feiral o produto de 45 adegas -das que a metade son de Rías Baixas e Ribeiro-, de consellos reguladores e outros expositores.
"O encontro é extrictamente profesional e tamén esperamos a participación de restauradores e profesionais hostaleiros de toda Galicia, aos que invitamos a participar nas actividades paralelas".
Segundo o presidente do Comité Executivo de Expourense, Ovidio Fernández Ojea, as maiores expectativas desta terceira edición de Vinis "Terrae" están postas nos contactos con importadores de Perú, Colombia e Guatemala xa que suporán a apertura "cara a uns mercados nos que podemos estar situados en cinco anos, grazas aos convenios entre Mercosur e a Unión Europea".
O sector de viños e augardentes en Galicia
A facturación do sector vitivinícola representa en Galicia máis do 4 por cento do total da industria agroalimentaria e supera os 130 millóns de euros como media anual de negocia, segundo explicou o delegado territorial da Xunta de Galicia en Ourense, Rogelio Martínez.
O sector galego conta con 650 adegas que dan emprego direto a máis de mil persoas que, no 90 por cento dos casos, son das zonas rurais.
O 95 por cento do viño producido en Galicia ten unha calidade avalada por algunha das cinco denominacións de orixe, que tienene rexistradas 482 adegas do total existente, das que 201 son do D.O. Rías Baixas, 119 do Ribeiro, 98 da Ribeira Sacra, 41 de Valdeorras e 25 de Monterrei.
Actividades previstas
A terceira edición de Vinis "Terrae", ademais dos encontros entre importadores e adegueiros, contará con presentacións abertas ao público de cada unha do D.O. de viños e da de Licores e Augardentes, un seminario a cargo do profesor da universidade de Santiago de Compostela Víctor Sixto e charlas sobre alternativas de comercialización de viños para as pequenas adegas, a cargo do enxeñeiro técnico Juan Carlos Suárez Penas.
Ademais proxectarase o documental "Ao pedir de boca" sobre as rutas turístico-gastronómicas da provincia de Ourense
