O tempo continúa este mércores marcado pola inestabilidade en Galicia, con ceos parcialmente nubrados e chuvascos que poden estar acompañados de tormentas e saraiba.
As previsións de Meteogalicia debuxan este panorama ante a influencia dun centro de baixas presións situado entre Azores e Lisboa e con aire frío nas capas altas da atmosfera.
Así as cousas, as temperaturas máximas experimentarán un lixeiro descenso, co que aínda superarán os 20 graos en case todas as cidades. As mínimas do mapa urbano moveranse entre os 9 graos de Lugo e os 14 de Vigo.
