O cerco volverá ao mar o luns despois de tres meses de paro

Os mariñeiros do cerco integrados en Acerga, contrarios ao actual modelo de repartición de cotas, manterán a acampada fronte ao complexo administrativo da Xunta en Santiago ata este domingo, día 24, e o luns 25 sairán a faenar, tras tres meses de paro en sinal de protesta.

Así o decidiron este luns en asemblea, e logo da proposta da Consellería do Mar de fixar unha cota mínima por barco que varía en función das súas toneladas de arqueo (GT), algo que ven "un logro", aínda que non satisfai plenamente a súa reivindicación, que pasa por que a distribución de posibilidades de pesca se faga de xeito lineal, por tripulante.

En declaracións a Europa Press, o representante de Acerga Andrés García comentou que a decisión de regresar ao mar tómase, entre outros motivos, porque "non se pode aguantar máis" a actual situación de inactividade. "Hai que gañarse a vida", constatou.

Os ao redor de 110 buques do segmento do cerco aos que representa esta asociación levan amarrados, a modo de protesta, desde o pasado 19 de outubro.

O luns 25 é a data elixida para volver faenar, e ata a xornada anterior, o domingo 24, seguirán acampados en San Caetano. "Porque o campamento é o noso símbolo", destacou García.

"UN GOBERNO MÁS COMPRENSIVO". Os cerqueiros aceptan que a proposta de Mar "é unha mellora", aínda que seguen véndoa como "un mal parche" e Acerga advirte de que continuará reivindicando unha repartición que ven "máis xusta", determinada polo número de tripulantes, e sen ter en conta as capturas históricas.

"Este ano xa dixo o Goberno que non, así que teremos que esperar a que se aclare a situación política en España e que haxa un goberno máis comprensivo ca este", resaltou Andrés García.

Neste escenario, sinalou que o ánimo entre os armadores está "alto", porque saben que "o que se fixo foi un logro", pero que "máis que ganas", o que hai é "necesidade" de ir ao mar.