Os grelos de Galicia obtiveron o seu rexistro definitivo como Indicación Xeográfica Protexida (IGP) polo que, tras o nomeamento provisional do Consello Regulador e a súa publicación no Diario Oficial de Galicia, lograron a súa consolidación como produto de calidade.
A Xunta informou nun comunicado de que José Dadín Rivadas foi nomeado presidente deste Consello, apoiado por cinco vogais en representación do sector produtor, outros tantos do sector comercializador en fresco e cinco máis do sector industrial.
Os obxectivos do Consello Regulador do IGP Grelos de Galicia son a defensa do produto, a aplicación e vixilancia do seu regulamento e o fomento e control da calidade do produto amparado.
Así mesmo, o Instituto Galego de Calidade Alimentaria (Ingacal) será o órgano encargado do control e certificación para os produtos desta indicación, cuxa tutela administrativa corresponde á Consellería de Medio Rural.
Os grelos galegos desta indicación, cuxa calidade foi recoñecida pola Unión Europea o pasado 30 de outubro, prodúcense en todos os concellos da Comunidade e presentan unha cor verde intenso e unha textura fibrosa, así como un sabor lixeiramente acedo.
