Nin o programa de televisión Masterchef poderá competir cos hostaleiros da localidade ribadense, que desde o vindeiro venres, 10 de maio, e ata o 19 deste mes, afanaranse por seducir os padais dos seus clientes coas creacións máis orixinais, ao módico prezo de 1,30 euros. A pioneira campaña Ribadeo de Tapeo alcanzará este fin de semana a súa oitava edición e farao con múltiples novidades.
Este ano sumáronse a esta exitosa iniciativa, que promoven o Concello e a Deputación de Lugo, 55 bares e restaurantes da vila ribadense e tamén das parroquias. «Nunca houbera tantos inscritos», sinalaba este luns o alcalde, Fernando Suárez, ao presentar a campaña gastronómica, que deseñou a Axencia de Desenvolvemento Local.
Entre os hostaleiros de recente incorporación á cita figuran, por exemplo, os propietarios do bar ecolóxico Amodiño, situado no casco antigo da vila. En canto ás tapas, hainos que seguen apostando polo produto autóctono, como as fabas de Lourenzá con callos de bacallau que ofrecerá El Café ou a empanada de longueiróns de La Solana.
Hai quen opta polos produtos da caza, como o prato de xabaril con salsa agridoce de mazá e cebola confeitada da taberna El Cabás, aínda que a carne de ave protagoniza abundantes preparacións, como o coulant de foie de pato con xeada de champiñón de Portocelo do Hotel AG Porcillán.
As elaboracións máis sinxelas, como o bocadiño de lacón con grelos da vinoteca El Galicia, compiten coas máis sofisticadas, como o tubo de solombo de porco ibérico recheo de queixo de rulo de cabra con cama de verdura e salsa de crema de champiñones, que ofrecerá o restaurante A Dorada do Cantábrico.
A oferta non se centra só na vila, xa que establecementos das parroquias como Casa Foguete de Vilaframil ou A Taberna de Lola da parroquia ribadense de Remourelle, tamén se suman.
PREMIOS
«Fai falla consumir en 20 establecementos, é dicir, conseguir 20 selos dos locais participantes, para poder concursar no sorteo de premios», avanzou o rexedor. Os comensais poden gañar un fin de semana nunha casa de turismo rural, un curso de surf de tres días para dúas persoas que ofrece a escola Hola Ola e un bono consumo de 100 euros na praza de abastos de Ribadeo, a cargo da asociación profesional de vendedores do citado espazo comercial.
Moi poucos logran consumir en todos os bares participantes, pero quen o consiga farase co galardón Larpeiro de Ouro, co que poden obter 100 euros para comprar na tenda de surf Hola Ola ou dúas viaxes en avioneta para unha persoa, grazas ao Club Aéreo de Ribadeo.
Os hostaleiros tamén compiten entre si e, non só o público, senón tamén un xurado especializado encargarase de elixir as mellores tapas.
Doce hoteis ofrecen do 10 ao 19 de maio un 15% de desconto nas pernoctaciones, visitas guiadas e un sorteo dunha noite no hotel que elixa o cliente que participe no Ribadeo de Tapeo. A cita compleméntase con actuacións da escola de música ou con funcións de teatro, como a d'El Brujo, o sábado, día 11.
