A borrasca Bella, que puxo en alerta este luns a media España, seguirá exercendo a súa influencia ata o vindeiro mércores con vento, frío e choiva. Así, Galicia continuará este martes con inestabilidade atmosférica e fluxo de vento do noroeste que arrastra aire frío e húmido, polo que se espera unha xornada de ceos nubrados con chuvascos que serán de neve a partir dos 700-800 metros. E a situación continuará así durante os próximos días.
A temperatura máis baixa deste luns foi de -1 grao en Pedrafita do Cebreiro, mentres que na capital lucense oscilaron entre os 3 e os 6 graos. Estas temperaturas seguirán sen cambios ou con lixeiros descensos na xornada deste martes. Na capital lucense os termómetros oscilarán entre os dous e os sete graos, segundo as previsións da Meteogalicia. Nas outras grandes urbes galegas, as mínimas moveranse entre os tres graos de Ourense, os catro de Pontevedra e os sete da Coruña ou Ferrol, mentres que as máximas alcanzarán os 11 graos na Boa Vila, Vigo ou a cidade herculina.
O ano 2020 despídese así cun frío invernal e coa metade do Estado en alerta pola borrasca Bella, que se prevé que continúe os próximos días deixando nevadas e fortes refachos de vento en gran parte de Galicia.
A comarca da Montaña seguirá o martes en alerta amarela por neve, con acumulacións superiores aos cinco centímetros en 24 horas. Pola súa banda, na Mariña o nivel do aviso manterase en laranxa por ondas de máis de cinco metros, e en amarelo ata o mediodía por ventos de forza sete. Tamén as Rías Baixas estarán en alerta laranxa por ondas de máis de cinco metros.
