Un viño tinto da Ribeira Sacra, Peza do Rei, foi elixido para a cea de gala do Mes da Hispanidade que se celebrará hoxe en Washington. Trátase da primeira vez que un caldo galego encha os vasos dun dos acontecementos sociais máis importantes da capital dos Estados Unidos. A esta cea acudirá o presidente estadounidense Barack Obama e a súa esposa.
Trátase dun evento que organiza a asociación de congresistas e políticos hispanos que se converteu unha cita obrigada para a elite empresarial, política e económica do país.
Tamén é unha cita de gran relevancia gastronómica cuxos viños e pratos son meticulosamente analizados pola prensa norteamericana. Para Adegas Cachín, que elabora Peza do Rei, representa unha oportunidade única de exercer como embaixador dos viños galegos, como recoñeceu o seu xerente, César Enríquez.
Cachín introduciuse hai cinco anos no mercado estadounidense con excelentes resultados. A súa colleita 2008 obtivo 91 puntos na prestixiosa revista do gurú do viño Robert Parker,
Para o consello regulador da denominación de orixe, esta elección supón unha plataforma importante para que os viños da Ribeira Sacra alcancen un maior recoñecemento no mercado de Estados Unidos.
Para César Enríquez, creador deste viño, ser seleccionado representa o «premio a un esforzo de moitos anos e a unha constancia no traballo, apostando por un produto de calidade e moi persoal».
Enríquez asegura que a elección beneficia non só á súa adega, senón que se trata dun recoñecemento «para toda a Ribeira Sacra e a súa denominación de orixe, porque esta é unha zona onde se está traballando con gran rigor na práctica totalidade das adegas, apoiadas en todo momento pola súa característica viticultura en bancales, achegando unha materia prima singular».
Peza do Rei é un tinto da variedade mencía obtido de uvas que se cultivan na parte ourensá da Ribeira Sacra.
Caracterízase por unha cor vermella picota con reflexos violáceos de aspecto limpo e brillante. Ten un aroma de intensidade media, de marcado carácter froiteiro, con recordos a froitos do bosque, cheos de matices, cun fondo de madeira que lle achega complexidade aromática.
En boca ten unha entrada amable e de gran frescura.
