Saborear a gastronomía local e dinamizar o sector hostaleiro do municipio. O Concurso de Tapas Vila das Pontes mantén, nesta quinta edición, os seus obxectivos, e unha traxectoria ascendente, coa participación dunha vintena de locais e coa resposta masiva duns clientes cada vez máis entregados.
Así o resaltaban algúns dos hostaleiros que na primeira xornada do concurso -que deu comezo o sábado 12 e prolongarase ata o domingo día 20- xa se mostraban satisfeitos polo «incrible» arranque da cita.
«Levamos apenas unha hora dende o inicio e xa tivemos que poñernos a facer máis tapas, as que tiñamos preparadas xa se terminaron», recalcaba o propietario do mesón O Martínez, gañador da última edición do concurso.
E é que, como nos anos anteriores, o certame pontés presenta ata 22 propostas culinarias por un módico prezo dun euro, un dos grandes alicientes que animan, nestes complexos tempos a máis dun, a degustar e votar pola súa ración máis apetitosa.
«O concurso é interesante para os negocios, pero tamén para nós que podemos acudir e gozar da gastronomía», sinalan algúns dos clientes.
As zamburiñas, o polbo, as gambas, as luras e os lagostinos son algúns dos produtos máis empregados nas suculentas receitas que propoñen, por exemplo, os locais A Fervenza, As Tres Pontes, A Cepa, A Capela ou o Carboeiro.
Pero ademais, a carne, de porco ou de tenreira, tamén ten un papel primordial nas propostas da Bodega, A Cova ou o mesón O Martínez.
E como non podería ser doutro xeito, tamén hai opcións máis contundentes como as fabas con ameixas do Marbella ou un rolo de filete con xamón, panceta, queixo e salsa roquefort das Campeiras.
E as sorpresas, como cada ano, tampouco faltan. Hai locais, como o Trastoy 3, que non queren dar pistas aos clientes e presentan a súa tapa baixo o curioso nome de 'Nin pa min...nin pa ti...', recalcando que está cociñada con esencia da terra e algo máis.
PREMIOS
Para seguir coa tradición, o Instituto Pontés de Promoción Económica (Ippec), organizador da cita, premiará aos asistentes e veciños que se animen a degustar durante estes días as racións con dez premios de 50 euros cada un -en vales de cinco euros que deberán ser consumidos nos establecementos participantes no concurso antes do 31 de decembro deste ano- o que suman un total de 500 euros.
Ademais, os locais participantes na cita gastronómica optarán a dous premios: A Mellor Tapa Pontesa, outorgada polo xurado popular, e a Tapa coa Mellor Presentación, que concederá a comisión oficial de valoración, composta por cinco persoas da organización.
O acto de clausura e a entrega de premios celebrarase o venres 25, ás 19.00 horas, na Casa Dopeso, despois de que o día 21 sexan recollidas todas as urnas cos votos do xurado popular nos establecementos participantes.
O sorteo de premios do público terá lugar o día 22 ante a secretaria do Concello e os premiados deberán acudir ao acto de clausura para recibir os seus galardóns.
HORARIOS
Os veciños ou visitantes interesados en coñecer as propostas gastronómicas deseñadas polos 22 locais ponteses poderán acudir a eles no horario de degustación que será de mañá, de 12.00 a 14.00 horas, e de tarde, desde as 19.30 ás 22.30 horas, todos os días ata o vindeiro domingo.
As zamburiñas, o polbo, as luras ou os lagostinos son algúns dos produtos máis empregados nas racións
A entrega de premios do certame de tapas celebrarase o día 25, ás 19.00 horas, na Casa Dopeso
OS 22 PARTICIPANTES | ||
Local | Tapa | |
A Bodega | Lombo de porco asado | |
A Caseta do Parque | Pingüíns de Madagascar | |
A Fervenza | Brochetas mar e terra | |
As tres pontes | Croquetas de mar | |
A Cova | Escalopíns con crema de queixo | |
A Cepa | Pincho de mar | |
As Campeiras | Vacatola | |
Centro | Guiso de San José | |
Carboeiro | Marabillas de mar | |
As Torres | Cor e sabor | |
Vales | Francesiña | |
Calvo | Luras na súa tinta con guarnición de arroz | |
Porta do Eume | Champi recheo | |
Casa Teresa | Crocante | |
A Capela | Piruletas de zamburiñas na súa salsa con xamón ibérico | |
Dreams | Tosta de xamón con queixo de rulo de cabra e cebola caramelizada | |
Pontes do Eume | 14 de setembro | |
Mesón Ana | Rape en salsa da avoa | |
Mesón O Martínez | Solombo de terneira ou xeito Martínez | |
O Marbella | Fabes con ameixas | |
Trastoy 1 | Maikeliña | |
Trastoy 3 | Nin pa min... nin pa ti |