Os mapas do tempo anuncian para este luns ceos pouco nubrados en Galicia, aínda que no norte —onde se prevén algo máis cubertos— pode chegar a rexistrarse algún chuvasco débil ocasional. Notarase máis o vento en case toda a comunidade, con parte dela en alerta amarela polos refachos e aviso en toda a costa. Ese é de nivel amarelo no litoral pontevedrés e lucense e laranxa no da Coruña.
Nunhas xornadas marcadas polo impacto da borrasca Gloria na Península, que este domingo se fixo notar bastante menos en Galicia que no resto de España, a comunidade está así pendente dos avisos por vento e ondas. En canto ás temperaturas, Meteogalicia avanza un lixeiro descenso.
