O Concello de Quiroga (Lugo) comezou a dar os primeiros pasos para conseguir que o aceite que se obtén das oliveiras centenarias que hai no val dispoña dunha denominación de calidade específica ou de orixe.
Para iso, o equipo de goberno local, do PP, iniciou contactos co Departamento de Alimentación da Facultade de Veterinaria da Universidade de Santiago e coa Consellería de Innovación e Industria.
O alcalde de Quiroga, Xulio Álvarez, espera obter deste organismo da Xunta unha subvención dentro do programa de investigación, desenvolvemento e innovación (I+D+i).
Álvarez indicou que “é o momento de ir a por unha denominación de orixe para o noso aceite, algo que se logrará se somos capaces de demostrar as peculiaridades do produto que se elabora na nosa comarca”.
O rexedor engadiu que para conseguir este obxectivo “necesitamos estudos rigorosos, por iso é polo que nos puxemos en contacto coa Universidade de Santiago e coa consellería, máxime cando o seu titular, Fernando Blanco, está moi interesado neste asunto”, engadiu.
Abundancia de oliveiras
Nos municipios de Quiroga e Ribas de Sil abundan as oliveiras, que suman unhas 3.000. A maior parte do aceite que se obtén en antigas almazaras ten fins domésticos e en moitos casos só medicinais.
Desde hai uns oito anos hai veciños que intentan darlle unha saída comercial, como a decena de colleiteiros que acoden desde o 2000 á feira do aceite que se celebra en Bendilló.
Ademais, Manuel Gómez, un dos propietarios das adegas ‘Val de Quiroga', apostou por este produto e todos os anos obtén ao redor dos 6.000 quilos. Así mesmo, plantou 600 novas árbores, que en oito anos estarán en plena produción e espérase chegar a recoller unhas 25 toneladas de oliva.
