Tras un venres tórrido no que os termómetros chegaron a marcar por encima dos corenta graos en numerosos puntos da comunidade, a prealerta para o sábado mantense en multitude de concellos galegos. Iso si, unicamente disporase a alerta laranxa na zona da conca do Miño, onde máis están a incidir as temperaturas extremas nos últimos días.
Con respecto a este sábado, Meteogalicia non prevé "cambios significativos", aínda que as temperaturas diminuirán lixeiramente: en Ourense haberá unha temperatura máxima de 40 graos; en Pontevedra e Vigo, 35; mentres que Santiago, Lugo, A Coruña e Ferrol non chegarán a 35.
Finalmente, o domingo tanto as temperaturas mínimas como as máximas descenderán lixeiramente na metade sur da comunidade e aumentarán no norte. Ourense seguirá rexistrando a máxima dese día con 40 graos. Seguiranlle Santiago de Compostela, con 35; e Pontevedra, Ferrol e Vigo, con 33.
A pesar da intensa calor, o risco de incendios non é extremadamente elevado dada a ausencia de fortes refachos de vento e ás choivas das últimas semanas en boa parte do territorio.
