Galicia volverá vivir este martes unha xornada de ceos despexados polo xeral, aínda que se esperan choivas pola tarde e pola noite no norte da provincia de Lugo, segundo a predición de Meteogalicia. As temperaturas mínimas manteranse sen cambios significativos, cos termómetros roldando os baixo cero no interior da comunidade.
O temporal de vento seguirá azoutando con forza e, de feito, está activa unha alerta de nivel amarelo ante a previsión de refachos de 80 quilómetros por hora en toda Galicia, que se eleva a laranxa no litoral da Coruña.
Este martes rexistrouse un refacho tempestuoso de 121 quilómetros por hora en Estaca de Bares e superáronse os 100 km/h en Cedeira, Lousame, Malpica ou Cuntis.
En canto ás temperaturas nas grandes urbes, os valores máis baixos rexistraranse en Ourense (1 grao) e Lugo (2 graos), mentres que en Pontevedra ou Vigo os termómetros non baixarán de 6º. En canto ás máximas, o mercurio chegará a 16 graos na cidade olívica, fronte aos 15º da Boa Vila, os 12º da Coruña e Compostela ou os 10 da capital lucense.
