Tres catadores suecos, gañadores de VINA do Concurso sobre Coñecementos dos Viños de España 2008, visitan estes días o D.O. Rias Baixas para profundar nos seus coñecementos destes viños. Esta mañá participaron nunha cata de quince viños na sede do Consello Regulador, na que probaron Rías Baixas Albariño, Rías Baixas Salnés, Rías Baixas Condado, Rías Baixas Rosal, Rías Baixas Tinto, algunha elaboración con leas e en madeira, entre outros. Os catadores coincidiron en destacar a gran calidade e variedade destes viños.
A analista da oficina comercial do ICEX en Suecia, Ana Isabel García, subliñou o gran coñecemento que hai entre o consumidor dos viños de Rías Baixas desde hai uns anos. Neste sentido, as cifras de exportación mostran unha tendencia á alza da venda de viños nese país que no último exercicio situouse na oitava posición no escalafón, pasando en cinco anos de 12.000 l. a 66.000 l. Ana Isabel García recordou que “o consumidor sueco está moi interesado na cultura do viño”.
Os viños en Suecia adquírense nas tendas do monopolio, que é o encargado de seleccionar os viños: ''prima a relación calidade prezo e a calidade'' destaca a analista do ICEX en Suecia. Os viños de Rías Baixas posúen un prezo alcanzable dentro do grupo dos viños de calidade: ''Non son viños baratos, pero tampouco están entre os caros'' explica Ana Isabel García, quen recorda que ''hai nove millóns de suecos e que é un país que non é produtor, de maneira que todo o viño que se consome impórtase''.
Pola súa banda, a responsable de promoción do Consello Regulador, Eva Mínguez, resalta que Suecia é un ''mercado moi interesante debido ao seu poder adquisitivo''. Os suecos contan cunha renda media-alta e homoxénea. Estes tres catadores estarán en Rías Baixas visitando adegas e viñedos ata mañá.
Certame
O Concurso sobre Coñecementos dos Viños de España 2008, ademais do certame en si convértese nun acto de relacións públicas moi sinalado, pois participan un nutrido grupo de profesionais suecos de alto nivel, de feito, na pasada edición fixérono noventa persoas. O concurso organízase en catro equipos, integrado por tres profesionais cada un: catadores, xornalistas especializados, monopolio estatal Systembolaget, e estudantes de sumillería da escola Vinkällan. Os concursantes deben responder a unha serie de preguntas sobre o viño español e participar nunha cata a cegas na que deben identificar o viño catado. O xurado estivo integrado por tres relevantes especialistas. O grupo gañador desta edición foi o dos catadores, que elixiu realizar unha viaxe aos D.O Rías Baixas e Bierzo para ampliar os seus coñecementos.
