"¿Podo pedirvos un favor?", inquiriu o presentador do programa ¡Boom!, Juanra Bonet, ao equipo dos Suevos na emisión deste venres, "¿podedes facer de novo o berro de guerra?". Acto seguido, os catro concursantes orixinarios de Redondela reuníronse e, unindo as súas mans, espetaron un sonoro "¡Wonenburger!".
Ante a incredulidade de Bonet, Álex dispúxose a explicar o transfondo deste berro motivacional. "Fai referencia a unha persoa, a unha matemática galega –María Wonenburger–", quen foi discriminada na época franquista polo simple feito de ser muller e viuse obrigada a emigrar.
"Estudou en Madrid e déronlle unha bolsa Fulbright. Foi a primeira española en conseguilo, e foise a Yale para facer unha tese doutoral, din que bastante boa", proseguiu o membro dos Suevos. "Ela volveu a España coa tese pero non lla recoñeceron. Fixo outra no CSIC e tampouco lla recoñeceron, polo que tivo que emigrar a outros lugares como Canadá ou Estados Unidos", dixo.
Para acabar, Álex denunciou as dificultades que se atopou María Wonenburger na época franquista, "e que aínda se atopan moitas mulleres no mundo da ciencia", levándose a valoración de todo o público pola súa alegación en favor do feminismo.
<>
