O prazo para que as comunidades de veciños que asuman un gasto como consecuencia do Segundo Dividendo Dixital —o cambio da TDT— poderán solicitar unha subvención a partir deste xoves. A información para solicitar estas axudas está dispoñible na páxina web www.televisiondigital.es
O Segundo Dividendo Dixital é un proceso, iniciado o pasado mes de xullo en España, polo que algunhas canles de televisión dixital terrestre (TDT) cambiarán de frecuencia de emisión para ceder ese espazo ao despregamento das futuras redes de conectividade 5G, segundo detalla o Ministerio de Economía.
Para que os cidadáns poidan seguir dispoñendo da oferta completa de TDT, ao longo dos próximos meses, ao redor de 850.000 edificios de vivendas colectivas deberán realizar adaptacións nos seus sistemas de recepción do sinal televisivo. Esa adaptación require da actuación dun instalador de telecomunicacións rexistrado na base de datos da Secretaría de Estado para o Avance Dixital. Non será necesario realizar a transformación nas vivendas unifamiliares e nos edificios comunitarios de menor tamaño.
Tampouco se verán afectadas polo cambio de frecuencias de ámbito nacional e autonómico as edificacións de Asturias, Barcelona, A Coruña, Menorca, Melilla e unha parte das provincias de Toledo e Murcia.
Todos os cidadáns deberán resintonizar os seus televisores
Para minimizar o impacto deste proceso sobre a cidadanía, o Consello de Ministros aprobou mediante un real decreto o pasado 21 de xuño a concesión directa de subvencións por valor de ata 145 millóns de euros, que serán xestionadas pola empresa pública Red.es. As contías oscilan entre 104,3 euros e 677,95 euros por edificación, en función da infraestrutura de recepción de sinal TDT previamente instalada.
Independentemente do tipo de equipo de recepción de sinal dos edificios, todos os cidadáns deberán posteriormente resintonizar os seus televisores. Este proceso, idéntico ao producido durante o Primeiro Dividendo Dixital en 2014 e 2015, non implicará a aparición nin desaparición de canles de televisión, simplemente desprázanse de frecuencias. Ademais non suporá a obsolescencia de televisores nin descodificadores TDT.
PROCESO. A liberación do Segundo Dividendo Dixital está a producirse de forma graduada na maior parte de España. As primeiras zonas en arrincar os accesos de novas frecuencias TDT, o pasado xullo, foron Mallorca, Eivissa, Formentera, 94 municipios do norte da provincia de Cáceres e 24 municipios do sur de Huelva. Este mes fóronse sumando máis provincias, entre elas Lugo.
A liberación do Segundo Dividendo Dixital culminaría antes do 30 de xuño de 2020.
