Ingvar Kamprad, fundador da cadea sueca de mobles e obxectos para o fogar Ikea e falecido en xaneiro aos 91 anos, doou a metade da súa fortuna persoal para impulsar a actividade económica nas zonas rurais do norte de Suecia.
O testamento, difundido este martes, establece que a metade da herdanza, a parte que non irá aos seus tres fillos e a súa fillastra, será canalizada a través da fundación da familia, creada en 2011 e que busca estimular a investigación e a educación, sobre todo, na súa rexión natal de Småland.
Cos novos fondos, a actividade da fundación ampliarase á rexión norteña de Norrland, o que entronca coa afección de Kamprad por revitalizar as zonas máis rurais de Suecia e evitar que se vaian despoblando, segundo a Fundación Ikea.
"Sempre estivo interesado en Norrland e visitaba con frecuencia a rexión. Quería facer posible que a xente nova vivise alí e non tivese que emigrar", dixo á edición dixital do xornal Dagens Nyheter o director da fundación, Per Heggenes.
O que non se aclarou é a canto ascenden os activos de Kamprad, considerado como unha das 500 persoas máis ricas do mundo segundo a revista Forbes, pero que sempre aseguraba que o seu patrimonio persoal era en realidade moito máis modesto.
O motivo da discordia é que Kamprad construíu hai anos un complexo sistema de fundacións e outras compañías con sedes en varios países, controladas pola familia, para reducir a carga fiscal ao mínimo e evitar intentos de compra externos.
De acordo co diario sueco Sydsvenskan, Kamprad tiña en 2014 unha fortuna persoal duns 750 millóns de coroas suecas (74 millóns de euros).
Ingvar Kamprad faleceu o 27 de xaneiro pasado na súa casa en Småland, rodeado dos seus familiares tras unha "curta enfermidade", segundo informou no seu día a empresa nun comunicado.
