Efectivos do Seprona de Corcubión procederon á aprehensión de 124 quilos de polbo e 38 quilos de cornetillo que proviñan do porto de Laxe de xeito ilícito, informou o Instituto Armado.
A investigación levada a cabo pola Garda Civil determinou que se estaba despachando polbo ilicitamente desde o porto de Laxe, e por este motivo montouse un dispositivo que finalizou este luns coa aprehensión do xénero xa mencionado que se transportaba nun vehículo isotermo.
O vehículo interceptado circulaba cos especímenes carecendo de documentación para a súa tenencia e foi denunciado por este motivo ante a Consellería de Mar da Xunta de Galicia, e neste mesmo sentido procedeuse a denunciar ao barco pesqueiro que despachou o produto.
Das pesadas realizadas na lonxa de Laxe púidose constatar que había 38 quilos de cornetillo, 41 quilos de polbo de talla inmatura (300-900 gramos por peza) e 83 quilos de polbo con talla apta para a súa pesca.
O polbo aprehendido foi posto a disposición do centro benéfico de Cáritas de Cee para colaborar cos máis necesitados e o cornetillo foi devolto ao mar en presenza dos interesados.
Aprehenden en Corcubión 124 quilos de polbo de procedencia ilícita
Unha investigación da Garda Civil determina que se despachaba desde o porto de Laxe
