Unha persoa tivo que ser excarcerada tras sufrir un accidente de tráfico na Pobra do Caramiñal. O turismo no que viaxaba a vítima chocou contra unha embarcación que se atopaba aparcada. Debido ao impacto, o pé da persoa accidentada quedou atrapado. Foi trasladada ao hospital do Barbanza.
Os feitos ocorreron na parroquia do Xobre, no lugar da Garita, ao fío das 18.20 horas deste venres. Nese momento o 112 Galicia recibía a alerta do sinistro a través da Policía Local, que solicitaba unha ambulancia.
A partir de aí, o persoal do CIAE 112 Galicia pasaba o aviso a 061-Urxencias Sanitarias, a Protección Civil e aos Bombeiros de Ribeira e de Boiro.
Colisión entre coche e camión
Por outra banda, dúas mulleres resultaron feridas este sábado pola mañá despois de que o coche no que viaxaban chocase contra un camión en Mañón.
O 112 Galicia tivo constancia do sinistro a través dun particular pasados uns minutos das 7.00 horas. Indicaba que se produciu un accidente de tráfico na estrada xeral que une Ortigueira e Viveiro, xusto á entrada do Barqueiro.
Foi nese momento cando o persoal do Centro Integrado de Atención ás Emerxencias 112 Galicia alertaba aos Bombeiros do Eume, a 061-Urxencias Sanitarias, aos axentes de Tráfico, a Protección Civil e ao GES de Ortigueira.
Excarceran a unha persoa tras sufrir unha colisión na Pobra do Caramiñal
Dúas mulleres resultaron feridas ao chocar contra un camión en Mañón
