Os socorristas da praia de Perbes, no concello coruñés de Miño, rescataron este sábado a dúas persoas, un adulto e un menor, que quedaran atrapados nun illote no mar, informou a central que coordina as urxencias en Galicia. Segundo o particular que alertou ao 112, os dous ían nunha pequena embarcación de madeira que se afundiu a 500 metros da costa.
Tras recibir o aviso, sobre as 17.40 horas, deuse parte a Salvamento Marítimo, que descartou a mobilización de medios unha vez se comprobou que o persoal de vixilancia xeral enviaba unha embarcación para rescatar a ambos. Así, foron evacuados ao porto de Miño en perfecto estado de saúde.
O 112 informou a Protección Civil de Miño, Garda Civil e ao servizo de gardacostas de Galicia.
SURFEIRO EN NIGRÁN. Este mesmo sábado tamén houbo outro rescate a un surfeiro que se atopaba en apertos en Nigrán (Pontevedra), na praia de Patos. Neste caso, un particular rescatouno cando estaba a poucos quilómetros da costa.
