Origo Biopharma amplía capital para avanzar no deseño de fármacos contra o cancro

A firma naceu para xestionar os avances obtidos por GalChimia no proxecto I04COLON, cuxo obxectivo é o desenvolvemento de produtos terapéuticos para combater o cancro de colon
Ramon Bosser, CEO de Origo Biopharma, e Julio Castro, presidente de Palobiofarma. BIOGA
photo_camera Ramon Bosser, CEO de Origo Biopharma, e Julio Castro, presidente de Palobiofarma. BIOGA

A empresa galega Origo Biopharma completou nas últimas semanas un proceso de ampliación de capital para fortalecer a súa estrutura accionarial e gañar músculo financeiro para afrontar con garantías os traballos de investigación que teñen como principal obxectivo o desenvolvemento en Galicia de varios fármacos de acción local, o primeiro deles contra o cancro colorrectal e a fibrose asociada á enfermidade de Crohn.

A compañía Origo Biopharma, fundada no ano 2017 e con sede no Parque Tecnolóxico de Galicia (Ourense), é froito dos avances da biotecnológica galega GalChimia, con sede no Pino (A Coruña), no proxecto IO4COLON, unha iniciativa que conta co respaldo da Xunta a través do Programa Conecta Peme 2018 , informou a compañía nun comunicado.

Origo Biopharma naceu para xestionar as achegas e os avances obtidos por GalChimia no proxecto I04COLON, e cuxo obxectivo é o descubrimento e desenvolvemento de innovadores produtos terapéuticos para combater o cancro de colon.

A propia compañía asegura que está centrada no "descubrimento e desenvolvemento temperán de novos medicamentos cunha alta necesidade médica non cuberta".

A empresa Origo Biopharma "é realista e admite que os resultados da I+D biofarmacéutica poden tardar en chegar". "Como mínimo fan falta dez anos para completar o desenvolvemento dun fármaco e, ademais, son necesarios millóns de euros", indícase no comunicado.

Engaden que o modelo de negocio da nova compañía radica en avanzar "ata chegar a un punto no que o produto sexa atractivo para que alguén o incorpore á súa carteira e o desenvolva. Aí sería fundamental a presenza dunha gran farmacéutica". 

Comentarios