O reivindicativo discurso de Michelle Williams: "Mulleres, votade no voso propio interese"

A estadounidense gañou o Globo de Ouro á mellor actriz dunha serie limitada ou película para televisión por 'Fosse/Verdon'
Michelle Williams nos Globos de Ouro. EFE
photo_camera Michelle Williams nos Globos de Ouro. EFE

Michelle Williams, que gañou o Globo de Ouro á mellor actriz dunha serie limitada ou película para televisión por Fosse/Verdon, instou as mulleres estadounidenses a que voten pensando "no seu propio interese".

"Mulleres, cando sexa o tempo de votar, por favor facédeo no voso propio interese. É o que fixeron os homes durante anos e por iso o mundo se parece tanto a eles", dixo a actriz nun apaixonado discurso feminista.

"Non esquezades que somos o grupo con dereito a voto máis grande neste país. Fagamos que se pareza máis a nós", engadiu.

Williams non só se referiu, implicitamente, ás eleccións presidenciais de Estados Unidos de novembro, senón que tamén destacou a importancia de seguir loitando pola igualdade entre mulleres e homes.

"Síntome agradecida de vivir nun momento na nosa sociedade no que as opcións existen. Como mulleres e como mozas, hai cousas que poden suceder aos nosos corpos que non son as nosas opcións", reflexionou.

A actriz dixo que sempre quixo vivir ao seu estilo, aínda que algunhas veces fóra de xeito caótico e outras precisa e calculada.

"Non podería ter feito isto sen usar o dereito a elixir das mulleres. De elixir cando ter os meus fillos e con quen", explicou.

"Sei que as miñas decisións se cadra son diferentes ás vosas, pero grazas a deus, ou a quen reces, que vivimos nun país fundado no principio de que son libre para vivir segundo a miña fe e para que vós podades vivir segundo a vosa", engadiu.

A 77 edición dos Globos de Ouro, que cada ano organiza a Asociación da Prensa Estranxeira de Hollywood (HFPA), está a celebrarse hoxe no Hotel Beverly Hilton de Los Ángeles (EE UU) para, como é tradicional, descorchar a tempada anual de premios de cine en Hollywood. 

Comentarios