Un vídeo que se fixo viral a través de Instagram e Whatsapp mostra a praia do Poris, no sur de Tenerife, chea de centos de quilos de microplásticos, antes de ser limpada por un grupo de voluntarios durante unhas cinco horas. A película foi gravada por María Celma, fundadora do movemento pola limpeza mariña Océano Limpio Tenerife, para concienciar da necesidade de reducir o consumo de plásticos dun só uso.
Celma explica nunha entrevista a Efe que o vídeo foi realizado o pasado 24 de marzo na praia de area do Poris, que ten unha lonxitude duns cen metros e unha anchura duns vinte e cinco metros, onde sempre se atopan grandes superficies cubertas de microplásticos. "Cada vez que vou limpar fago directos en Instagram, onde envorco a frustración que sinto", asegura a activista, quen anima á poboación a crear novos hábitos, como achegarse a calquera praia e dedicar o tempo que se poida a baleirala de microplásticos.
A praia do Poris, debido ás correntes mariñas e aos ventos alisios, é unha nas que máis microplásticos atopou de toda a illa, indica Celma, quen lamenta que, despois de pasar unhas cinco horas limpándoa, continuaba sucia, máis do que a vía no últimos tres anos. "Había unha cantidade inxente de microplásticos", alerta a fundadora do movemento pola limpeza mariña Océano Limpio Tenerife, o que fai que agora, "máis que nunca", a poboación ten que involucrarse e "deixar a comodidade de estar tombados sobre unha hamaca".
Aínda que falta "moita concienciación", noticias como a morte dunha tartaruga aforcada por unha bolsa de plástico ou de cachalotes con quilos de bolsas no estómago provocan que moitos vexan que se trata dun problema co que "non se quere terminar por comodidade". A publicación destas noticias e de vídeos como o de María Celma na praia do Poris conciencian á poboación que, ao seu xuízo, debe ser educada desde a infancia en casa e nos colexios.
A activista, que é profesora nun colexio da illa, lidera un programa educativo que consiste en informar sobre o perigoso uso do plástico e leva aos escolares ás costas para que vexan cos seus propios ollos o que ocasiona usar e tirar plástico. "Estamos a matar animais mariños por comodidade", denuncia Celma, quen comenta que o gran problema dos microplásticos é que non se poden reciclar porque son pequenos e conteñen diferentes tipos deste material, motivo polo que destaca que é esencial deixar de consumir plástico. Por iso, cando se recollen en bolsas o que se adoita facer é tiralos ao lixo normal ou queimalos, detalla, á vez que fai un chamamento aos enxeñeiros e creativos para ideen unha fórmula que permita "converter algo malo en algo bo".
