A pedida de man nun KFC que xerou burlas e acabará en gran voda

A historia de amor de Hector Mkansi e Nonhlanhla Soldaat fíxose viral desde a mesa dun KFC en Suráfrica. Foi alí onde el lle pediu matrimonio de xeonllos ante os sorprendidos clientes do establecemento de comida rápida, e onde algún dos presentes gravou un vídeo que se publicou despois nas redes sociais, nas que algúns internautas reaccionaron con burlas. Ante os comentarios, KFC propúxose atopar a parella para sorprendela e conseguiuno. E a sorpresa acabou sendo bastante maior, porque a noticia levou a compañías como McDonald's, Audi, Coca Cola ou Huawei a anunciar agasallos para a parella e a súa voda, que ao final será ao grande.