UN FUTBOLISTA de ascendencia albanesa non foi convocado para un partido do seu equipo en Serbia por ter feito un xesto político na celebración dun gol. Entendíase que a súa presenza podía alentar un conflito extradeportivo. E seguro que quen tomou a decisión tiña razón, polos exacerbados nacionalismos, neste caso de Estado, que chegaron a provocar guerras como a dos Balcáns.
Esa sanguenta contenda da que dun Estado xurdiron sete ten repercusión, por exemplo, no sorteo de grupos para a Eurocopa de fútbol, pois deses países algúns non poden coincidir. E España non é alleo a algúns bloqueos, pois non admite xogar con Xibraltar, e pola contra permite enfrontamentos con Kosovo a pesar de non recoñecelo. Este choque político provocou hai pouco unha colisión entre o ministerio español de Exteriores e o Comité Olímpico por non permitir competir baixo bandeira kosovar no territorio patrio nunha competición de karate. A política envólveo todo.