O Son do Camiño inicia tres días de música con 38 artistas e 33.000 asistentes
Iggy Pop, Rosalía, David Guetta ou Black Eyed Peas están entre os pratos fortes do festival, que encheu os hoteis en Compostela
Unhas 33.000 persoas, 38 artistas e tres días de festa. O compostelán Monte do Gozo volverá ser esta semana meta de peregrinación festivaleira coa celebración da segunda edición de O Son do Camiño, que encherá de música a capital galega entre este xoves e o sábado con nomes como Iggy Pop, David Guetta ou Rosalía.
Será ao mediodía deste xoves cando, por fin, se abran as portas do festival, que prolongará a súa festa ata ben entrada a madrugada do domingo, ante un público expectante que, como sucedeu coa primeira edición o pasado ano, esgotou os abonos para asistir en apenas unha hora.
Por iso, e tras o éxito de público de 2018, a organización volveu a apostar este ano por un elenco de artistas onde se equilibran as propostas internacionais e as nacionais, con representación tamén de grupos galegos e coa intención de consolidarse como unha gran cita festivaleira a nivel nacional. Os espectáculos distribuiranse en dous escenarios, o principal, Estrella Galicia, un enorme recinto de 20 por 36 metros; e o Escenario Galicia.
TRES DÍAS DE MÚSICA. Así, na xornada do xoves, a primeira, o Escenario Estrella Galicia acollerá as actuacións de Kitai, Royal Republic, Richard Ashcroft, Bastille, Die Antwoord e Dimitri Vegas & Like Mike; mentres que no Escenario Galicia estarán Alice Wonder, Molina Molina, Second, Graveyard, Beret e The Zombie Kids.
O venres, o prato forte de O Son do Camiño será Rosalía, unha das actuacións máis esperadas e que, na escaleta final, sairá ao escenario Estrella Galicia ás 23,15 horas. Seguirana, no mesmo, Black Eyed Peas e W&W. Antes, este emprazamento acollerá nomes como Bloc Party, Iván Ferreiro, Igloo ou Moito!. Pola súa banda, no Escenario Galicia actuarán o venres Cariño, Marem Landson, Hard GZ, Shinova, Varry Brava e Elysella.
Finalmente, o sábado 15 terá lugar o esperado concerto de Iggy Pop, que comezará ás 23,15 horas no escenario Estrella Galicia e ao que seguirá, xa de madrugada, David Ghetta.
Antes, no escenario principal tocarán os españois Vetusta Morla, The Hives, Electric Pyramid e Ortiga. O escenario Galicia programará para este último día Mordem, Baiuca, Familia Caamagno, Full, Bad Gyal, Ayax e Prok e Eme DJ, que será o encargado de pechar o tres días de festa.
TRANSPORTE ATA O FESTIVAL. Como xa ocorreu na primeira edición, espérase que o festival se deixe notar tanto no sector hostaleiro da cidade --que está ao 95% de ocupación-- como na mobilidade.
A gran aglomeración de xente que se espera que acuda ata o Monte do Gozo derivou na elaboración dun plan especial de transporte urbano, restricións de circulación e posta en marcha de áreas de aparcadoiro en San Lázaro (sen lanzadeira) e en Amio (con servizo de autobús) para os asistentes que cheguen no seu propio vehículo.
En concreto, o Concello de Santiago informou que se pecharán á circulación as rúas As Estrelas, Rúa da Agra dos Campos e Rúa do Gozo desde as 14,00 horas do sábado até as 3,30 horas do domingo, excepto para residentes e vehículos de mobilidade reducida. Do mesmo xeito, fontes municipais apuntaron que, en función da densidade de tráfico, poderán producirse cortes puntuais nas rúas Senande e San Marcos.
Con previsión de que o tráfico en Santiago sexa intenso esa xornada, o Concello recomenda que se empregue o transporte público, que estará reforzado por dous servizos lanzadeira.
Así, os buses lanzadeira partirán un desde o centro da cidade e o outro desde o recinto feiral de Amio, e operarán o xoves, venres e sábado. As liñas comezarán ás 12,00 horas o xoves e ás 14,00 o venres e sábado e finalizarán ás 4,30 na madrugada do xoves ao venres e ás 5.00 o resto das xornadas. A partir das 23,00 horas, só farán viaxes de volta.
En canto ao aloxamento, os hoteis, hostais e pensións da cidade rexistran unha ocupación do 95% e as prazas que quedan incrementaron considerablemente os seus prezos. Os asistentes a O Son do Camiño poden optar por acampar no propio recinto ou facer uso das tendas de campaña e cápsulas proporcionadas pola organización, aínda que as prazas para ambas as opcións están xa esgotadas.
Finalmente, segundo as previsións meteorolóxicas, a choiva podería volver facer acto de presenza no festival. Así, Meteogalicia recolle unha posibilidade de choivas do 65% para a noite do venres, que se eleva ao 80% para a xornada do sábado.