Eva Cárdenas abandona a dirección de Zara Home por motivos persoais

Eva Cárdenas decidiu abandonar a dirección de Zara Home por motivos persoais, confirmaron este luns a Efe fontes do grupo Inditex, que no seu lugar nomearon a Lorena Mosquera, actual directora do Área de Confección de Pezas de Punto de Zara Woman.

Cárdenas, parella do presidente da Xunta, Alberto Núñez Feijóo, dirixiu a cadea do grupo Inditex especializada en roupa e complementos para o fogar desde a súa creación, en 2003.

"Aínda que lamento que Eva deixe de dirixir Zara Home, respecto a súa decisión", dixo o presidente executivo de Inditex, Pablo Isla, quen lle agradeceu "todos os logros conseguidos" e a súa dedicación e talento creativo, que permitiron colocala "nun altísimo nivel de prestixio e expansión internacional, que garante hoxe a continuidade e o éxito do proxecto".

Para dirixir esta nova fase "ilusionante" da marca, a cadea pasará a estar capitaneada por Lorena Mosquera, "a persoa idónea para liderar Zara Home polo seu coñecemento do produto, os seus valores humanos, a súa experiencia na xestión e experiencia na empresa", subliñou Isla.

Licenciada en Dereito pola Universidade da Coruña (UDC), Mosquera incorporouse en 2002 a Inditex, onde desenvolveu a súa actividade en diferentes departamentos do grupo.

Tras liderar a Sección de Complementos de Zara, asumiu hai catro anos a dirección do Área de Confección de Pezas de Punto de Zara Woman.

Segundo a mesma fonte, Lorena ten por obxectivo continuar co crecemento internacional da marca e profundar na integración entre as tendas e online. 

Zara Home, que foi a primeira insignia do grupo Inditex en vender a través de internet, suma 590 tendas en 75 países, dos que en 37 opera tamén online, e factura anualmente uns 800 millóns de euros.