Achan o cadáver dunha muller en Valencia e deteñen á súa filla e ao noivo desta
20 de agosto de 2020 (22:06 h.)
O corpo da muller presenta signos de violencia
A Garda Civil achou este xoves o cadáver dunha muller duns 45 anos nun domicilio da localidade de l'Alcudia de Crespins (Valencia) e detivo á súa filla e ao noivo desta en relación coa morte.
Segundo confirmaron a EFE fontes da investigación, o corpo da muller, que levaba varios días morta, presentaba signos de violencia e foi achado este xoves, despois de que un veciño alertase do mal cheiro e de que facía tempo que non a vían.
Os axentes detiveron á filla da vítima, de 19 anos, e ao seu noivo, de 18, en relación con este crime, do que non se ofreceron máis detalles.
Os dous detidos atópanse en dependencias da Garda Civil á espera de pasar a disposición xudicial.