A CUP non ve diferenzas de fondo na proposta de JxCat-ERC e insiste na súa abstención
Os catro deputados da formación non apoiarían polo tanto unha eventual investidura do candidato Jordi Sánchez
A CUP non aprecia "diferenzas de fondo" na última proposta de acordo de goberno de JxCat e ERC con respecto á anterior, polo que non revogou a decisión do seu consello político de que os seus catro deputados se absteñan na eventual investidura do candidato Jordi Sànchez. Nun comunicado difundido este venres pola tarde, a CUP afirma que "non ten xustificación que o Estado español queira intervir de novo" no debate de investidura do Parlament "vulnerando a súa propia legalidade".
Sobre a proposta que lle fixeron chegar JxCat e ERC, a CUP advirte de que non ve "diferenzas de fondo" con respecto á anterior, xa que "continúa tendo deficiencias importantes e decisivas", motivo polo cal non convocou de momento unha nova reunión do consello político para pronunciarse. Precisa, por exemplo, que ve pouca consistencia en ámbitos como "o da construción e a materialización republicana, a concreción dun proceso constituínte, e a articulación de políticas sociais e económicas orientadas a quitar privilexios aos sectores sociais que aínda os manteñen".
A CUP argumenta, así mesmo, que posto que a proposta recibiuna ás 23.56 horas do mércores, e o xoves participou na folga xeral feminista, a súa militancia non tivo tempo para poder valorala, co cal se deben respectar "os tempos internos" da súa organización.
Aínda que a CUP non aclara a súa posición respecto ao eventual pleno do luns, si que afirma que "os tempos, debates e soberanía do Parlament non poden estar impostos nin condicionados polo Goberno, nin polo Tribunal Constitucional, nin por ningún outro órgano" que estea disposto "a pisar a súa propia legalidade para impedir a materialización da vontade do pobo de Cataluña". Por este motivo, a CUP empraza "ás forzas democráticas e republicanas a respectar os mandatos populares e a tirar adiante cos procesos políticos, independentemente das chantaxes e condicionantes das institucións políticas e xudiciais do Estado".
A reacción da CUP prodúcese pouco despois de que o xuíz do Tribunal Supremo Pablo Llarena denegase a Jordi Sànchez (JxCat) o permiso para acudir ao Parlament ao pleno convocado para o vindeiro luns, 12 de marzo, para investilo president da Generalitat e tamén rexeitase a súa posta en liberdade.