Unha canción dun trapeiro de Vilagarcía incendia as redes por incitar aos malos tratos
O artista coñecido como Fresh Rupe viuse obrigado a retirar de Youtube o videoclip do tema, que inclúe frases como "me pide que abuse de ella, que le dé bien duro, que le dé maltrato"
"Me pide que abuse de ella, que le dé bien duro, que le dé maltrato". É parte da letra de Mi nombre, un tema asinado polo cantante de trap vilagarcián Fresh Rupe en colaboración con Duvali que incendiou as redes por incitar ao abuso. A indignación xerada obrigou ao autor a retirar de Youtube o videoclip da canción, gravado na localidade arousá.
Un dos primeiros colectivos en denunciar a canción foi O Soño de Lilith, que acusa os autores do tema de fomentar "a cultura da violación" con frases " tan vomitivas coma "dice que no puede pero quiere mucho más".
Fresh Rupe conta cun gran séquito de fans. En Instagram acumula máis de 71.000 seguidores e os dous vídeos da súa conta de Youtube xa superan as 150.000 visualizacións. Do mesmo xeito que o tema denunciado, o machismo está moi presente nas letras das súas demais cancións.