Desenvolven en Galicia un sistema con luz ultravioleta para desinfectar os caixeiros
Unha empresa con base no municipio coruñés de Negreira discorreu un innovador sistema co que as entidades bancarias poden atopar a solución á desinfección dos seus caixeiros automáticos por mor da aparición do coronavirus.
O método, denominado Disys e desenvolvido pola corporación tecnolóxica Tevalcor, consiste nunha carcasa que protexe totalmente o caixeiro e que realiza un permanente proceso de desinfección con luz ultravioleta, o cal se detén momentaneamente mentres o usuario vai proceder a realizar unha operación.
Unha vez utilizado o caixeiro, o tempo mínimo para que poida ser usado de novo unha vez quede totalmente desinfectado e higienizado é 30 segundos, de forma que ao aproximarse un novo usuario o biombo volvería abrirse ao detectar a súa presenza mediante un sensor.
"Ante o problema que apareceu para as nosas vidas o que intentamos é buscar algo que podamos achegar á sociedade para protexer á xente", dixo a Efe o xerente da compañía Gonzalo Varela.
Tevalcor, que obtivo diferentes recoñecementos internacionais en innovación tecnolóxica e colabora con marcas de renome, ten capacidade para fabricar ata un centenar deste tipo de carcasas nos seus talleres de Negreira, o que podería ser unha óptima solución para protexer aos usuarios dos aproximadamente 50.000 caixeiros automáticos que hai en España.
O xerente da compañía avanzou que algunhas entidades financeiras xa mostraron interese por esta nova solución tecnolóxica e que representantes da Xunta de Galicia realizarán a mediados de maio unha visita ás instalacións da empresa para comprobar in situ o seu funcionamento.
Este sistema, que utiliza radiación ultravioleta tipo C, "o único capaz de desinfectar e ser efectivo ante xermes e virus", apostila Varela, é utilizado xa para a desinfección de determinadas zonas en centros hospitalarios e posúe "unha efectividade do 99 % en función do contacto da luz ultravioleta sobre unha determinada superficie".
Ao posuír unha radiación tan potente, que pode resultar daniña para a epidermis, o feixe de luz apágase mentres a persoa fai uso do caixeiro, precisa Gonzalo Varela.
Ademais indica que o innovador método pode ser válido tamén para a hixienización e desinfección doutros sistemas de uso colectivo, como poderían ser por exemplo os expendedores automáticos de billetes para transporte público.