Deteñen un home con 64 plantas de marihuana e erradican un punto de venda de drogas en Vigo

A Policía Nacional detivo este martes un home de 47 anos, español e con domicilio en Vigo, como presunto autor dun delito de tráfico de estupefacientes.

Segundo informou a Policía Nacional, a detención é produto dunha investigación iniciada a finais do pasado mes de xaneiro logo de ter coñecemento da posible existencia dun punto negro de venda de drogas na zona de Praza de España.

Durante a investigación, os axentes observaron que os compradores se dirixían a un local de hostalería da rúa Barcelona, onde accedían a unha zona reservada, para logo duns minutos volver saír e marcharse do lugar.

Así pois, a Policía Nacional elaborou un dispositivo conxunto coa Policía Local e varios indicativos dispuxéronse estratexicamente polas inmediacións antes de acceder ao interior do local, onde identificaron ao seu responsable e aos clientes, descubrindo unha importante cantidade de marihuana, cocaína, diñeiro en efectivo e efectos utilizados para a distribución, venda e consumo de estupefacientes.

O detido foi trasladado a comisaría, onde se lle tomou declaración e comprobouse que carecía de antecedentes policiais, antes de polo, con todo o actuado, a disposición do Xulgado de instrución de Vigo en funcións de garda. 

MARIHUANA NO COCHE. Dentro do plan de loita contra o tráfico de droga desta comisaría, os axentes detiveron a outro home –español de 35 anos e con domicilio en Vigo– como presunto autor dun delito contra a saúde pública tras sorprendelo con 64 plantas de marihuana coas que ía iniciar unha plantación.

Segundo informou a Policía, un grupo de investigadores, tras levar a cabo as pertinentes pescudas, seguiu a un vehículo que circulaba pola avenida do Aeroporto, e aproveitando un momento en que reduciu a velocidade, procederon a interceptalo.

Tras identificar o condutor realizaron unha requisa do interior do vehículo e descubriron 64 plantas de marihuana, as cales, segundo puideron pescudar, ían ser trasladadas a unha zona remota do monte de Cabral para iniciar unha plantación.

Os axentes procederon a deter a este home e a trasladalo a comisaría onde, tras tomarlle declaración, comprobaron que carecía de antecedentes policiais.

O detido e todo o actuado están a disposición do Xulgado de Instrución de Vigo en funcións de garda.