Feijóo advirte que Galicia non pode parar por culpa dun "multipartito"
O presidente da Xunta e candidato á reelección polo PP, Alberto Núñez Feijóo, advertiu de que Galicia non se pode parar" a partir do luns pola inexperiencia dun "multipartito", xa que é "imprescindible" a decisión e a experiencia para xestionar ante a pandemia.
Unha pandemia que haberá que "sortear por moito tempo" e ante a que o Goberno galego non se pode pór a aprender porque "non é tempo de perder o tempo, senón de xestionar desde o luns coma se fose un día máis", segundo asegurou nun mitin en Ames, no que reafirmou que o seu obxectivo é "vencer o virus".
Feijóo criticou as "declaracións partidistas" de quen chamaron a manifestarse o 8-M masivamente cando "xa estaba o virus circulando" e non declararon o confinamento ata uns días despois porque lles interesaba" a participación nesas concentracións.
Ante o coronavirus que aínda segue presente, cun brote na Mariña con máis dun centenar de contaxiados, cre que é tempo "de xestión e non de declaracións, de responsabilidade e non demagoxias e de certezas e non de incógnitas".
En definitiva, é "tempo de non perder o tempo", aseverou, e traballar desde o luns 13 de xullo coma se fose un día máis.
Por iso, puxo en valor que a Xunta que el preside ten a "posibilidade real" de empezar a traballar desde o primeiro día porque non vai perder o tempo en poxar "consellerías, pelexar por quen vai ser o presidente, sortear consellerías ou quen serían os vicepresidentes".
Reprochou aos partidos da oposición "só saben criticar" mentres a Xunta actúa e pediu aos votantes que desconfíen destas formacións que queren meterlles medo e dinlles que non acudan ás urnas, cando os colexios electorais nunca foron "tan seguros como agora".
Feijóo instou, como fai en todos os mitins, a ir votar "durante 15 minutos o" domingo para que sexan os galegos quen elixan e ninguén decida por eles, e ese é "o trato democrático" que ofrece fronte ás "declaracións partidistas" doutros.
Para dar unha resposta á pandemia "é mellor a xestión sanitaria e non o nacionalismo", advertiu, e tamén é mellor "a estabilidade e non o populismo" ante as consecuencias económicas derivadas da crise sanitaria.
Do mesmo xeito que ante os "incumprimentos" con Alcoa, Ence, As Pontes e Meirama, é necesario unha Xunta que defenda Galicia e "non ao Goberno central", dixo en referencia aos socialistas.
O candidato popular asegurou que coa Xunta que el preside está "en mans responsables" e Galicia non se pode permitir nestes momentos que esas mans se dediquen a un "pulso entre partidos, siglas ou logotipos".
Así, insistiu en que o futuro ten que ser unha Galicia unida e non dividida por un "multipartito" que o luns 13 "non sabe dicir quen sería o presidente, a vicepresidenta, o conselleiro de Economía ou o de Sanidade".
Pola súa banda, comprometeu que será un presidente "sen imposicións" que só se deberá ao resultado que salga das urnas.
Un resultado que o presidente provincial do partido e candidato, Diego Calvo, instou a non dar por feito, porque os votos non están dentro das urnas ata o día 12 e a oposición intenta "confundir á xente" para que nesa xornada "falte un voto para o escano 38" e o PP non consiga a maioría absoluta.
Calvo pediu aos simpatizantes que lle boten unha man ao seu partido neste sentido e secundou que "nunca votar nunhas eleccións foi tan seguro" como será o vindeiro domingo, polo que todos poden ir votar "tranquilos".