Os Franco recorrerán a sentenza que ordena devolver o Pazo de Meirás ao Estado
A familia Franco recorrerá a sentenza dada a coñecer este mércores polo Xulgado de Primeira Instancia número 1 da Coruña que ordena a devolución do Pazo de Meirás ao Estado ao que declara propietario do Inmoble.
Segundo o seu avogado, Luis Felipe Utrera, a resolución adoece de erros e evita rebater os argumentos fundamentais esgrimidos pola familia do ditador para reter a posesión. No entanto, entende que os Franco non deben abandonar o inmoble ata que haxa unha resolución xudicial firme.
En declaracións a Europa Press, o letrado sinalou a súa intención de recorrer a pesar de admitir que aínda lle falta realizar un estudo pormenorizado da resolución, que ten 400 páxinas, e que ademais de ordenar a devolución do pazo ditamina que o Franco non deben ser indemnizados polos gastos nos que afirma incorrer para o mantemento da propiedade.
"Desde o punto de vista xurídico, non podo estar máis en desacordo coa sentenza, que a falta dunha lectura en profundidade parece que evita rebater os argumentos fundamentais da contestación á demanda -afirmou o avogado-. ás veces un pensa que nin sequera se leu a contestación á demanda." Ao seu xuízo, a resolución é "tecnicamente deficiente".
Utrera tamén critica que a resolución de por probados todos os feitos contidos nun libro sobre o Pazo de Meirás escrito dous militantes do Bloque Nacionalista Galego que declararon claramente o seu antifranquismo. "Evidentemente imos recorrer e evidentemente confiamos en que as instancias superiores resolvan en dereito", engadiu.
O letrado dixo sentirse "moi decepcionado" porque confiaba nunha sentenza xuridicamente aceptable "pero non foi así", segundo manifestou, para engadir que a familia non se esperaba esta resposta por parte da Xustiza.
Segundo Utrera o Estado sempre considerou o pazo como propiedade súa,"cando todos os españois ou a maior parte, ou os que non están contaminados politicamente saben que non foi así".
Apuntou que cando a propiedade foi destruída no ano 78 o Estado esqueceuse totalmente dela, e Meirás foi reconstruído por Carmen Polo. "Nese momento non se acordou que era seu", sinalou, tras recordar que o Concello A Coruña cobroulle cincocentas mil pesetas a dona Carmen Polo pola extinción do incendio.
No procedemento, a Xunta de Galicia, os concellos de Sada e A Coruña e a Deputación coruñesa defenderon tamén a postura da Avogacía do Estado, mentres que como demandados constaban seis familiares de Francisco Franco e unha sociedade limitada.