Un corredor de aire polar continental aberto entre un anticiclón e unha borrasca é o que deu paso a unhas temperaturas demasiado baixas estes días de finais de marzo en Galicia, unha situación que cambiará esta noite cunha subida importante dos termómetros de ata dez graos de diferenza.
"Temos un anticiclón onde normalmente está a borrasca ao oeste de Irlanda que está a arrastrar aire máis frío e seco do centro de Europa, e unha borrasca entrando polo suroeste, desde Portugal, con nebulosidade e humidade", explican a Efe fontes de Meteogalicia.
Entre ambas as áreas de alta e baixa presión formouse un corredor de aire polar continental "que é o que está a afectar a Galicia", con moito frío esta madrugada que dará paso a temperaturas "máis altas que onte que, acompañadas de ventos do nordeste moderados, xeraron unha sensación térmica máis baixa", engaden as fontes.
Por exemplo, en Ourense, provincia onde se rexistraron estas madrugada temperaturas de -8ºC, a capital pasará dunha mínima de 1ªC esta mañá a 8 mañá, mentres que A Coruña recibirá chuvascos e o vento amainará e baixará dos case 90 km/h de hoxe.
O noroeste da provincia coruñesa permanece en alerta laranxa por temporal costeiro, con ventos que poden alcanzar forza 8.
Esta partida meteorolóxica gañaraa xa que logo a borrasca, que traerá máis humidade procedente do sur xa progresivamente desde esta tarde con mellores temperaturas, pois "para ser comezos de abril fai bastante frío", din en Meteogalicia.
Esta mañá houbo algo de neve en zonas altas e tamén xeo, sobre todo nas provincias de Lugo e Ourense con xeadas xeneralizadas no interior.
Así, a neve colleu esta mañá por sorpresa a numerosos veciños de varias localidades da provincia ourensá, que estes días permanecen nas súas casas polo confinamento obrigado, ante a caída anecdótica de copos de neve en pleno mes de marzo.
Ler máis: Marzo despídese con ata -6 graos na montaña lucense
Cualedro, Celanova, Allariz, Carballiño e Toén, esta última situada a poucos quilómetros da cidade de Ourense, son algúns dos puntos que viron caer estes copos de neve, que deixaron nalgúns sitios unha estampa branca tras o descenso significativo das temperaturas.
Pola súa banda, a Dirección Xeral de Tráfico recollía a recomendación de circular con precaución entre os quilómetros 130 ao 144 en ambos os sentidos na autovía A-52 á altura de Fumaces, na provincia de Ourense.
En todo caso, o plan de viabilidade invernal está activado e os medios quitaneves a disposición cando sexan necesarios, extremo que non se produciu estes días, detallan a Efe fontes da Delegación do Goberno en Galicia.
Tamén a nivel nacional, a influencia dunha masa de aire frío e seco e doutra máis tépeda e húmida deixará este martes tempo inestable xeneralizado e nevadas en cotas moi baixas do centro e este peninsulares, aínda que a neve cederá aos poucos protagonismo á choiva e empezaranse a recuperar as temperaturas.
PREVISIÓN. O mércores quedaremos na influencia das baixas presións co que aumentará a inestabilidade. Así, espérase unha xornada de ceos anubrados con posibilidade de choivas ocasionais que tarde-noite máis persistentes no terzo norte.
As temperaturas ascenderán moderadamente, especialmente as mínimas. Os ventos soprarán do nordés moderados, sendo fortes no litoral norte.
