O presidente da Xunta, Alberto Núñez Feijóo, avanzou este martes a próxima posta en marcha de dous "hospitais de reforzo" na Coruña e en Santiago de Compostela con entre 300 e 450 camas adicionais entre ambos. A Administración autonómica non descarta abrir un máis en Vigo.
Nunha conferencia de prensa telemática, Feijóo advertiu de que o pico da pandemia do coronavirus aínda non chegou a Galicia e de que "o mes de abril será peor que o mes de marzo", polo que chamou á sociedade a prepararse para "semanas duras".
O hospital de reforzo na Coruña, con entre 200 e 300 camas, instalarase no Expocoruña e o de Santiago, con entre 100 e 150 camas, estará no Multiusos Fontes do Sar. A maiores, Feijóo explicou que o comité clínico de Galicia non descarta ter que habilitar outro hospital de reforzo no Instituto Feiral de Vigo.
Entre outras decisións, avanzou que a Xunta prevé facer 800 test diarios nas residencias de terceira idade e de discapacidade ata chegar a todos os centros e a todas as persoas.
