En Marea aprema á Mesa do Congreso a pór en marcha comisión do Alvia
Miguel Anxo Fernán Vello, en declaracións no Congreso, lamentou que transcorresen catro meses desde que se aprobou a creación e aínda non se teñen dado os pasos necesarios para a súa conformación
O grupo confederal de Unidos Podemos-En Comù Podem-En Marea, a iniciativa dos deputados da confluencia galega, remitiron á Mesa do Congreso un escrito no que apreman á Cámara a pór en marcha a comisión de investigación sobre o accidente do tren Alvia en Angrois en 2013.
O portavoz de En Marea, Miguel Anxo Fernán Vello, en declaracións no Congreso, lamentou que transcorresen catro meses desde que se aprobou a creación desa comisión de investigación, coa oposición do PP, e que aínda non se desen os pasos necesarios para a súa conformación.
Por iso, remitiron un escrito á Mesa da Cámara solicitando a súa "inmediata creación", igual que onte fixo a principal plataforma de vítimas do accidente, que solicitou por carta á presidenta do Congreso, Ana Pastor, que puxese en marcha a comisión.
"É un acto de xustiza, a comisión é necesaria e débese concretar en tempo e forma", dixo o deputado de En Marea tras acusar ao PP de estar a entorpecer a creación da comisión con "manobras de dilación".