Un axente da Policía Local de Ferrol sufriu a rotura dun testículo a consecuencia da patada que lle asestou un mozo de 16 anos cando trataba de introducilo nun coche patrulla. O mozo fora interceptado nas proximidades do seu domicilio, na esquina da rúa República Arxentina coa estrada de Castela, tras ser sorprendido arroxando diversos obxectos, como macetas, á vía pública desde a súa vivenda. 

O incidente produciuse sobre as 10,00 horas deste luns, 24 de febreiro, cando os axentes foron requiridos pola actitude do mozo, que está ingresado de luns a venres no Centro de Educación Especial Terra de Ferrol e que pasa os festivos e fins de semana no domicilio familiar coa súa nai e avoa. 

Ao parecer, o menor de idade xa protagonizou con anterioridade incidentes deste tipo, polo que xa é coñecido polos axentes da Policía Local de Ferrol e da Policía Nacional, que elaboraron multitude de informes coas súas accións, remitidos de xeito recorrente á Fiscalía de Menores. 

Tras ser localizado e reclamar a presenza dunha ambulancia do 061-Urxencias Sanitarias para poder fornecerlle algún tipo de tranquilizante, os axentes estimaron que o mellor era que agardase no interior do coche patrulla, para evitar que abandonase a zona. Nese momento, o menor aproveitou para propinarlle a un deles unha patada na zona dos testículos. 

A pesar da agresión, o axente repúxose e continúo coa súa quenda, ata que, durante a tarde, comezou a atopase mal e decidiu acudir ao servizo de urxencias do Hospital Juan Cardona, onde, tras unha exploración inicial, localizáronlle un problema nun dos testículos, e recomendáronlle trasladarse ao Hospital Arquitecto Marcide, onde ás poucas horas foi intervido de urxencia. 

Segundo fontes consultadas por Europa Press a intervención finalizou con éxito e o axente ten por diante agora un proceso de recuperación. 

Ademais, a Fiscalía de Menores, tras este incidente, ordenou o ingreso do agresor, de xeito permanente e ata que non tome unha nova decisión, no Centro de Educación Especial Terra de Ferrol, situado nas proximidades do Hospital Arquitecto Marcide.