Os peregrinos poden entrar en Santiago, pero non pasar a noite noutros municipios pechados

Os peregrinos que poidan acreditar que este venres xa iniciaran o Camiño de Santiago poderán entrar e durmir na capital galega malia o peche perimetral, aínda que só poderán pasar en tránsito por outros municipios perimetrados, se é preciso para continuar o seu traxecto, sen pasar a noite nos mesmos nin facer uso doutros servizos como os restaurantes. 

Fontes da Vicepresidencia Primeira da Xunta, área da que agora depende Turismo, confirmaron a Europa Press que viaxeiros e peregrinos que se atopen nestes días en territorio galego poden continuar a súa estancia "con normalidade" sempre que non se atopen ou queiran desprazarse a municipios con peche perimetral. Todo iso, respectando "todas as medidas sanitarias establecidas". 

No que respecta aos peregrinos que aínda están a realizar o Camiño de Santiago, a Xunta recórdalles que poden pasar en tránsito polos municipios pechados, pero só para seguir co seu traxecto. Isto significa que non poderán quedar a pasar a noite nos mesmos, nin facer uso doutros servizos como restaurantes. De ter previsto durmir nalgún deles, veranse obrigados a cambiar o seu destino e a achegarse a algunha localidade limítrofe. 

Neste sentido, a Xunta recorda que os peregrinos teñen á súa disposición ferramentas como a reserva online de albergues públicos que lles permite coñecer a ocupación e reservar unha praza.

A EXCEPCIÓN DE SANTIAGO. Como excepción, a Xunta expón que os peregrinos que xa estivesen no Camiño este venres, cando se decretou o peche perimetral da capital galega, e poidan demostralo con selos, si poderán acceder a Santiago e durmir na capital, respectando "escrupulosamente" as medidas sanitarias, incluído o uso obrigatorio de máscara.