Recuperan unha serpe de 80 centímetros do forno dunha vivenda de Vigo

A Unidade Ambiental de Intervención Rural (Umir) da Policía Local de Vigo recuperou unha serpe de 80 centímetros de lonxitude achada no interior dun forno, na cociña dunha vivenda de San Andrés de Comesaña.

Segundo informou a Policía Local, o pasado xoves foi recuperado este animal do interior dun forno, tras o que os axentes procederon á súa liberación no seu hábitat natural, xa que se trata dunha especie autóctona.

A Policía Local remarcou que ao chegar o verán "é frecuente" detectar a presenza de serpes preto das vivendas do arrabalde da cidade, algunhas das cales se poden atopar nos xardíns e poden chegar a acceder a garaxes e domicilios.