El Colegio Oficial de Químicos de Galicia instala su sede en Santiago de Compostela

O Colexio Oficial de Químicos de Galicia (Colquiga), que preside Manuel Rodríguez Méndez, xa ten a súa sede en Santiago de Compostela. O pasado venres, 29 de xuño, a xunta directiva celebrou a súa primeira reunión nas novas instalacións. A nova sede do Colexio Oficial de Químicos de Galicia, que substitúe á situada na avenida Urzáiz de Vigo, está situada en Área Central Fontiñas (1ª planta, local 31-E).

Manuel Rodríguez Méndez explica que o cambio de localización da sede débese a que "desde hai anos as persoas colexiadas demandaban un lugar máis céntrico, desde o punto de vista xeográfico, para situar a nosa sede. Querían que o colexio estivese máis próximo dos colexiados e colexiadas", asegurou.

Outra das razóns de elixir Santiago responde á proximidade das institucións, ademais de por motivos técnicos. "A sede de Vigo era un local en réxime de aluguer, que xa vencera e que os propietarios prorrogaran ata o seu novo vencemento”, explica Manuel Rodríguez Méndez, quen aproveitou esta circunstancia, cumprindo o mandato recibido pola Xunta Xeral do 18 de novembro de 2017, para buscar un local en Santiago e adquirilo en propiedade.

O decano, que asumiu o seu cargo á fronte do Colexio Oficial de Químicos de Galicia en xaneiro de 2017, tamén apunta que a localización de Santiago permitirá ofrecer a colexiados e colexiadas unha maior e mellor oferta formativa e de actividades ao longo do ano.

No entanto o decano non ocultou a súa nostalxia con este cambo: “Este é un momento triste, sobre todo despois de que Vigo, concretamente a emblemática rúa Urzáiz, acolla a nosa sede desde os anos 50”, Rodríguez Méndez, destacou ademais que Vigo sempre nos acolleu con agarimo e estivo ao noso lado; por iso para min, como vigués e como decano, deixar esta cidade foi dobremente triste. Pero seguiremos tendo a Vigo como un referente na vida do noso Colexio", anunciou.

O Colexio Oficial de Químicos de Galicia constituíuse en Xunta Xeral o 20 de abril de 1952. Inicialmente adquiriu a denominación de Colexio Oficial de Químicos de Vigo, onde tiña a súa sede. "Naceu en Vigo porque a cidade tiña puxanza industrial e porque tamén os impulsores da iniciativa tiñan aquí o seu lugar de residencia e de traballo", Co paso dos anos o ente colexial adoptou a denominación actual de Colexio Oficial de Químicos de Galicia e seguiu tendo a súa sede en Vigo. Ao finalizar 1952 o Colexio Oficial de Químicos de Galicia contaba con 77 colexiados e colexiados. Hoxe achégase aos 600 colexiados e colexiadas, incluídos activos e xubilados.