As autoridades cren que o incendio de Notre Dame tivo unha orixe accidental
"Nada por agora vai na liña dun acto voluntario", destacou en declaracións á prensa o fiscal de París, Rémi Heitz
As autoridades francesas priorizan a hipótese dunha orixe accidental do incendio que devastou durante horas a catedral Notre Dame de París e os investigadores comezaron xa a interrogar ás testemuñas. "Nada por agora vai na liña dun acto voluntario", destacou en declaracións á prensa o fiscal de París, Rémi Heitz, que é o responsable da investigación.
Heitz explicou que os expertos terán que facer constatacións no lugar dos feitos, pero que non as poderán efectuar ata que non entren no edificio, algo que polo momento "non é posible porque non é estable". Segundo o seu relato, houbo unha primeira alerta ás 18.20 (16.20 GMT) pero a constatación do lume chegou 23 minutos máis tarde no envigado. Entre tanto, procedeuse á evacuación da basílica.
A Fiscalía abriu o mesmo luns pola noite unha investigación por destrución "involuntaria por incendio". Este martes pola mañá, o ministro de Cultura francés, Franck Riester, xa avanzara que a hipótese máis probable era a dun incendio accidental que pareceu iniciarse ao redor da agulla da catedral onde se estaban realizando obras de restauración, para o que se montou un andamiaxe de 100 metros de altura.
Cinco empresas traballaban nesa restauración e os interrogatorios da quincena de empregados que estaban presentes comezaron.